Нам таксама проста быць у такім натоўпе вучняў Хрыста, калі мы святкуем. На Божае Нараджэнне, не важна, калі мы яго адзначаем, мы сядаем за святочны стол, робім падарункі адзін аднаму, гаворым прыгожыя словы. У такой сітуацыі проста быць вучнем Хрыста і святкаваць яго Нараджэнне.
Натоўпы, якія хадзілі за Езусам, цалкам змянілі свой настрой, калі сутыкнуліся з тым, што за веру ў Хрыста, за вернасць Яму трэба будзе цярпець. У адно імгненне для гэтых людзей усё перастала быць такім простым і відавочным. Яны былі гатовыя радавацца разам з Хрыстом, але не былі падрыхтаваныя ставіць сабе патрабаванні. Тады, калі Езус запрасіў сваіх вучняў быць паслядоўнымі, не жыць толькі для сябе і “не плыць па цячэнні”, натоўп яго паплечнікаў стаў імгненна змяншацца. Настолькі імгненна, што былым слухачам Хрыста было прасцей забіць яго, чым пастарацца змяніць сваё жыццё.
Гэта так проста: быць хрысціянамі да таго моманту, пакуль Езус не будзе пералічваць патрабаванні да сваіх вучняў — прабачаць ворагам, не адказваць злом на зло, не засяроджвацца толькі на сабе і г. д. Аднак тады, калі Езус пачынае называць тое, што неабходна для таго, каб трапіць у Божае Валадарства, большасць хрысціян вырашае, што ім прасцей “адкупіцца” падарункамі, чым змяніць сваё жыццё на лепшае.
Чарговы год — гэта таксама зручны выпадак, каб пачаць новы этап жыцця. Даваць людзям магчымасць пачынаць усё спачатку — у гэтым праяўляецца любоў Хрыста да нас. Нават калі мы прызвычаіліся да нейкага стылю жыцця, Хрыстос ведае, якой прыгожай можа быць наша душа. Менавіта таму Ён прабачае і чакае нашага выпраўлення...
Ксёндз Кірыл БАРДОНАЎ.
