Да пачатку заняткаў засталося менш за тыдзень. ДАІ зараз узмоцнена працуе над тым, каб дарогі да ведаў былі бяспечнымі. Інспектары абследуюць прылеглыя да ўстаноў адукацыі тэрыторыі, правяраюць наяўнасць дарожных знакаў і абнаўляюць разметку. Да пачатку заняткаў кожны святлафор і «ляжачы паліцэйскі» павінны быць на сваіх месцах. Паралельна экіпажы ДАІ масава правяраюць правільнасць паркоўкі паблізу школ, наяўнасць агародж і шлагбаўмаў на ўездах на тэрыторыю навучальных устаноў. Разам з інспектарамі ДАІ Цэнтральнага РУУС Мінска карэспандэнт «Р» праверыла, наколькі бяспечныя дарогі да школ.
Едзем да гімназіі № 16 Мінска на вуліцы Л. Украінкі. Той, хто хоць раз бываў тут за паўгадзіны да пачатку ўрокаў, не па чутках ведае значэнне слова «апакаліпсіс». Аўтамабілі чарадой едуць адзін за адным, часам прытарможваюць ля школьных варот, прымушаючы тых, хто едзе ззаду, таксама спыняцца.
— Мы ставімся з разуменнем да бацькоў і на дробныя парушэнні накшталт кароткага прыпынку на з’ездзе справа, дзе ён забаронены, імкнёмся не звяртаць увагі, — аб’язджаючы вакол гімназіі, разважае дзяржаўтаінспектар ДАІ Цэнтральнага РУУС Мінска Юрый Благушка. — У дадзенай сітуацыі наша задача забяспечыць бяспечны рух, а не пералавіць усіх парушальнікаў. Прынцыповасць у гэтай сітуацыі можа абярнуцца яшчэ большымі праблемамі. Уявіце, калі я з кожным буду праводзіць гутарку, якую чаргу тут збяру. А людзі на працу спазняюцца. Хтосьці вырашыць аб’ехаць па «сустрэчцы»...
Разметку абнавілі больш чым на 3 тысячах пешаходных пераходаў.Што да дзіцячых аўтакрэсел, то амаль усе бацькі выконваюць правілы перавозкі маленькіх пасажыраў. Парушаюць толькі тыя, хто па дабрыні душэўнай згаджаецца падкінуць да школы не толькі сваё, але і суседскае дзіця, а дзіцячае крэсла ў машыне толькі адно...
Нечакана праз вуліцу Арлоўскую перад патрульнай машынай праязджае хлопчык на веласіпедзе. Нават не паспрабаваў спешыцца на пешаходным пераходзе. Дзянісу сем гадоў. Правілы дарожнага руху адскокваюць ад зубоў, а ўсё адно парушыў.
— За лета дзеці крыху прызабылі правілы. Многія летам гасцявалі ў бабулі ў вёсцы. Там трафік не такі ажыўлены, як у горадзе. Ім спатрэбіцца час, каб адаптавацца, — дзеліцца назіраннямі Юрый Благушка. — Пачнуцца заняткі — пойдзем у школы, будзем нагадваць ПДР.
Крыху забыліся правілы і вадзіцелі. Многія з іх прывыклі да адсутнасці дзяцей у школах падчас канікул, таму кідалі свае машыны як прыйдзецца. Зараз такое не пракоціць. У гэтыя дні паблізу навучальных устаноў працуе эвакуатар. Ён буксіруе прыпаркаваныя з парушэннямі легкавушкі на штрафстаянку.
Паблізу пешаходнага пераходу з парушэннямі прыпаркаваныя не менш за дзесяць легкавушак. Першай ахвярай эвакуатара становіцца цёмна-сіні Saab.Аб’ехаўшы вакол гімназіі, пераконваемся, што ўсе агароджы і шлагбаўмы на месцы. Вось эксперыментальны ўчастак, выдзелены спецыяльна для пасадкі і высадкі дзяцей. На праезнай частцы стракаціць новенькая дарожная разметка. Дарэчы, па заданні ДАІ там, дзе ўстановы адукацыі мяжуюць з праезнай часткай, а такіх месцаў у Мінску 182, нанеслі надпісы «ШКОЛА». Разметку абнавілі таксама больш чым на 3 тысячах пешаходных пераходаў.
Наступная ў нашым спісе — сярэдняя школа № 32. Паблізу пешаходнага пераходу з парушэннямі прыпаркаваныя не менш за дзесяць легкавушак. Першай ахвярай эвакуатара становіцца цёмна-сіні Saab. Не праходзіць і пяці хвілін, як легкавушка ўзнімаецца над зямлёй і прызямляецца на платформу МАЗа.
— Вадзіцель парушыў адразу два пункты правілаў. Па-першае, нельга паркавацца на закругленых участках дарог. Па-другое, нельга пакідаць аўто на пешаходных пераходах і бліжэй чым за 15 метраў ад іх у абодва бакі. Прыпаркаваныя з парушэннямі аўтамабілі пагаршаюць агляд дарогі як для іншых вадзіцеляў, так і для пешаходаў, — праводзячы позіркам эвакуатар, тлумачыць Юрый Благушка.
Праз пару хвілін пераконваемся ў яго словах. Ля пераходу з’явіліся два хлопчыкі з веласіпедамі. Абодва з-за невысокага росту ўстаюць на дыбачкі, каб праз прыпаркаваныя легкавушкі пераканацца ў адсутнасці аўтамабіляў. Інспектар сігналізуе транспартнай плыні спыніцца, і школьнікі спакойна пераходзяць на процілеглы бок.
Адбуксіраваўшы Saab на штрафстаянку, эвакуатар вяртаецца. Працы тут яму хопіць надоўга. Вось нехта кінуў Audi прама на службовым уездзе. Нават нумара тэлефона не пакінуў. Менавіта з-за такіх вадзіцеляў спецтранспарт не можа прадукты да школы падвезці і смецце забраць.
Дарэчы, усім уладальнікам дастаўленых намі сёння на штрафстаянку аўтамабіляў паркоўка на зебры ля школ уляціць у капеечку. Штраф за парушэнне правілаў паркоўкі на першы раз складзе адну базавую велічыню. Плюс кошт працы эвакуатара (60 рублёў) і кошт месца на штрафстаянцы (7 рублёў за першыя 3—10 сутак). У адным толькі Мінску на штрафстаянку адпраўляецца каля 50 аўтамабіляў у суткі. Меры вымушаныя. За 7 месяцаў гэтага года ў ДТЗ загінулі 15 непаўналетніх.
Якім будзе верасень гэтага года, пакажа час. Ну а пакуль вадзіцелі і школьнікі прывыкаюць да ажыўленага руху, з 1 верасня ля кожнай мінскай школы і гімназіі будуць дзяжурыць экіпажы ДАІ. А з 25 жніўня па 5 верасня ў краіне праходзіць спецыяльнае мерапрыемства «Увага — дзеці!», падчас якога вадзіцелі павінны рухацца з уключаным блізкім святлом фар ці дзённымі хадавымі агнямі пры іх наяўнасці. Гэта спроба нагадаць дарослым пра адказнасць, якую яны нясуць за дзяцей: і сваіх, і тых, якія могуць апынуцца побач.
