Кацюшы БРЭЛЬ усяго чатыры дні ад нараджэння.Дыягностыка ў кішэні
Кацюшы Брэль усяго чатыры дні ад нараджэння. Малышка салодка пасопвае ў ложачку і не заўважае, як над ёй схіліліся дактары, якія праводзяць ультрагукавое даследаванне галаўнога мозгу. Да галавы дзіцяці ўрач ультрагукавой дыягностыкі аддзялення ўльтрагукавой дыягностыкі Вольга Трус прыкладвае датчык. І адразу расшыфроўвае выяву на сваім планшэце. Хоць апарат УГД сумяшчальны з любой прыладай, якая рэпрадуктуе, — планшэтам, смартфонам, маніторам. Дзяўчынка ўвесь гэты час мірна спіць. І яе мама Ганна задаволеная: цяпер яна ведае, што з дзіцем усё ў парадку і што ім пасля выпіскі з раддома не давядзецца хадзіць на даследаванні, як са старэйшай дачкой, напрыклад.
— Дваім маім дзецям патрэбны былі даследаванні па паказаннях, — усміхаецца мама. — Але тады ўсё было па-іншаму. Старэйшую дачку педыятр накіраваў на УГД галаўнога мозгу. І тады, а гэта было адзінаццаць гадоў таму, мы трапілі на дыягностыку толькі па папярэднім запісе за некалькі тыдняў. А тут — усё адразу.
У суседнім ложку спіць Кірыл Бандарэнка. Першынец у сям’і, ён з’явіўся на свет раней за тэрмін. Маладую маму Лізавету гэта, зразумела, турбуе. І ёй вельмі спадабалася, што малыша абследуюць проста ў палаце. Датчык прыкладваюць да тазасцегнавога сустава Кірыла. Ці ёсць вывіх у тазасцегнавым суставе, на вока складана вызначыць нават дасведчанаму спецыялісту. Таму на дапамогу прыходзіць дыягнастычнае абсталяванне. І чым раней, тым лепш. У дадзеным выпадку даследаванне эканоміць шмат часу, таму што скрынінг тазасцегнавых суставаў у дзяцей пасля выпіскі з раддома праводзіцца ва ўзросце прыкладна трох месяцаў. Робіцца гэта ў паліклініцы па месцы жыхарства. Ці варта казаць пра чэргі, чаканне і хваляванне бацькоў? Падчас маніпуляцый хлопчык нават не прачнуўся. Пры выпісцы мамы абследаваных нованароджаных атрымаюць эпікрыз з вынікамі УГД. Дарэчы, за год у абласным радзільным доме на свет з’яўляецца больш за 3,5 тысячы немаўлят.
Дзяўчынка ўвесь час агляду мірна спіць.Даведваюся, што ў аддзяленні ўльтрагукавой дыягностыкі раддома — самыя сучасныя ўльтрагукавыя сканеры высокага і экспертнага класаў. Кожны год тут выконваецца больш за 40 000 УГД жаночай рэпрадуктыўнай сістэмы і малочных залоз; пладоў у розныя тэрміны цяжарнасці, уключаючы даследаванні сэрца, сасудаў, галаўнога мозгу; а таксама ўнутраных органаў у нованароджаных дзяцей. Чым незвычайныя новыя даследаванні?
— Тым, што на абследаванне доктар сам прыйдзе ў палату. Ні маму, ні нованароджанага не давядзецца турбаваць, накіроўваючы ў аддзяленне ўльтрагукавой дыягностыкі. Партатыўнае абсталяванне, а гэта датчык і планшэт, змесціцца ў адной руцэ. Абсталяванне дазволіць правесці УГД не толькі дзіцяці, але і маме пасля родаў, калі гэта спатрэбіцца. Пакуль у раддоме пяць камплектаў партатыўных апаратаў для УГД. Абсталяванне атрымана па праекце міжнароднай тэхнічнай дапамогі ў рамках Праграмы трансгранічнага супрацоўніцтва «Польшча — Беларусь — Украіна 2014—2020», — удакладняе кіраўнік праекта, урач акушэр-гінеколаг Святлана Мазітава. — Гэта сумесны праект Клінічнага радзільнага дома Мінскай вобласці і Мазавецкай ваяводскай бальніцы ў Седльцы (Польшча). Сёння ў праектнай камандзе працуюць чатыры спецыялісты па ўльтрагукавой дыягностыцы раддома.
Праект мае глабальныя мэты: ахову здароўя маці і дзіцяці і аказанне спецыялізаванай медыцынскай дапамогі цяжарным жанчынам і нованароджаным дзецям. А яшчэ — палепшыць даступнасць высакаякаснай акушэрска-гінекалагічнай і неанаталагічнай дапамогі ў Мінскай вобласці і Седльцкім субрэгіёне. Разлічаны ён на два гады — да 2021 года — і суфінансуецца са сродкаў Еўрапейскага саюза.
Да галавы дзіцяці ўрач ультрагукавой дыягностыкі аддзялення ўльтрагукавой дыягностыкі Вольга ТРУС прыкладвае датчык.Малая вага ўзятая
— Рэалізацыя гэтага праекта дазволіць палепшыць даступнасць і якасць профільнай спецыялізаванай медыцынскай дапамогі для жаночага і дзіцячага насельніцтва рэгіёна, будзе садзейнічаць далейшай рэалізацыі Дзяржаўнай праграмы «Здароўе народа і дэмаграфічная бяспека» на 2016—2020 гады і Нацыянальнай стратэгіі ўстойлівага сацыяльна-эканамічнага развіцця на перыяд да 2030 года, — упэўнены галоўны ўрач Клінічнага радзільнага дома Мінскай вобласці Пётр Масько.
Што тычыцца УГД нованароджаных, то гэта жыццёвая неабходнасць. Мінскі абласны раддом — перынатальны цэнтр III ўзроўню, на які прыпадае 57,4 працэнта ўсіх дачасных родаў вобласці. З 3606 немаўлят, народжаных у мінулым годзе, 50 нарадзіліся з вельмі нізкай масай цела, да 1500 грамаў, а 11 з іх — з экстрэмальна нізкай масай цела, да 1000 грамаў. І такім малышам патрэбны асаблівы догляд.
— У аддзяленні анестэзіялогіі і рэанімацыі для нованароджаных дзяцей укарэнены ўнікальныя тэхналогіі выходжвання дзяцей з экстрэмальна нізкай масай цела пры нараджэнні, — удакладняе Пётр Масько. — Ва ўстанове ёсць комплекс, які складаецца з акушэрскага рэабілітацыйнага аддзялення і педыятрычнага аддзялення для нованароджаных (з перынатальнай паталогіяй і неданошаных).
Планаў на бліжэйшыя некалькі гадоў шмат. Напрыклад, закупіць спецыяльна абсталяваны медыцынскі аўтамабіль, які пры неабходнасці даставіць доктара да пацыенткі на дом і наадварот — цяжарную ў цэнтр. Таксама ў раддоме запрацуе адзіная камп’ютарная база перынатальнай дыягностыкі. А яшчэ ўпершыню будзе ўкарэнена тэхналогія так званай хатняй кардыятакаграфіі (КТГ) для ацэнкі стану плода на адлегласці. І ўсё гэта ў рамках Праграмы трансгранічнага супрацоўніцтва «Польшча — Беларусь — Украіна 2014—2020».
misnik@sb.by
