Бранiраваць будзе ветлiва

У краiне запрацавала ўласная сiстэма анлайн-бранiравання санаторыяў, гатэляў, экскурсійных тураў

У нашай краіне запрацавала ўласная сістэма анлайн-браніравання. Называецца яна прыгожа — Vetliva. З яе дапамогай можна падабраць і зарэзерваваць санаторый, гатэль, экскурсійны тур з любой кропкі свету. Першым гэтай магчымасцю скарыстаўся госць з Расіі, заказаўшы для сябе тур. Усяго ж за май апрабавалі новы сэрвіс звыш за 40 чалавек.

Размяшчэнне на сайце для пастаўшчыкоў турпаслуг бясплатнае, але яны плацяць пэўны працэнт з аперацый рэсурсу як турагенты.
Калаж Юліі КОСЦІКАВАЙ

Ідэя распрацоўкі партала з'явілася ў 2014 годзе падчас правядзення чэмпіянату свету па хакеі, увёў у курс справы дырэктар «ЦэнтрКурорта» Алег Міхайлаў. Нагадаем, «ЦэнтрКурорт» тады выступаў у ролі афіцыйнага тураператара. Пад чэмпіянат была распрацавана аўтаматычная сістэма браніравання, дзе госці маглі заказаць квіткі, гасцініцу і пры неабходнасці нават экскурсію. Так з'явілася задумка зрабіць праект больш маштабным:

— Хацелі стварыць рэсурс, які стаў бы фактычна гандлёвай пляцоўкай для размяшчэння максімальнай колькасці турпрапаноў для наведвання нашай краіны. 

Ідэю спецыялістаў падтрымалі і знайшлі ёй месца ў дзяржпраграме развіцця турызму на гэту пяцігодку. У тэставым рэжыме партал працаваў са студзеня.

— Сэрвіс уяўляе сабой вялікі турыстычны гід па краіне: апісанне гісторыі, унікальнай прыроды і культуры, шматлікіх славутасцей, інтэрактыўная карта і анонсы актуальных падзей у сферы турызму краіны, — такім чынам апісвае рэсурс Міхайлаў. Агучыў ён і мэту праекта: дапамагчы адкрыць Беларусь як краіну ветлівасці і гасціннасці, распавесці пра яе турыстычныя магчымасцi і спрыяць развіццю індустрыі гасціннасці з дапамогай сучасных тэхналогій.

Партал працуе адразу ў трох даменных зонах — .by, .ru, .com — і прапануе адпаведна кантэнт на беларускай, рускай і англійскай мовах. У перспектыве — кітайская і нямецкая версіі. Яшчэ на стадыі распрацоўкі рэсурс абзавёўся ўласным лагатыпам і слоганам. Назва, па словах начальніка аддзела аўтаматызаваных тэхналогій турызму «ЦэнтрКурорта» і кіраўніка праекта Vetliva Вольгі Дземяшкевіч, адлюстроўвае станоўчы стэрэатып аб гасціннасці і ветлівасці нашых грамадзян. Лагатыпам выбралі сімвал «Зорка Венера», не раз апеты ў вершах і песнях.

Выцягнутыя па левым баку межы адлюстроўваюць рух, палёт, імкненне наперад. За аснову каляровага рашэння ўзяты поўны сутачны цыкл: раніца, дзень, вечар, ноч. 

Для пастаянных кліентаў дзейнічае спецыяльная сістэма лаяльнасці, адзначаюць спецыялісты. Прадугледжаны перакрыжаваныя продажы паслуг: напрыклад, пры браніраванні гатэля сістэма аўтаматычна падбірае і прапануе наведвальніку экскурсіі на час знаходжання ў горадзе. Пры аплаце паслуг анлайн кліент можа выбраць зручны для яго спосаб аплаты. Функцыянал кабінета пастаўшчыка прадугледжвае зручнае і хуткае самастойнае размяшчэнне прапаноў, а таксама поўны кантроль над працэсам продажаў, выснову статыстычных, бухгалтарскіх справаздач. Гучыць прыгожа, але пераканацца ў частцы заяў так і не ўдалося.

Дзеля цікавасці заходжу на сайт, забіваю даты наведвання — першыя выхадныя чэрвеня. З пунктаў прызначэння ёсць толькі Мінск, Вілейка, Браслаў, Магілёў, Брэст. Хай будзе Мінск. Сэрвіс выдае 10 варыянтаў далёка не бюджэтных гасцініц, у тым ліку адзін хостэл. Нягуста. Але цэны не адрозніваюцца ад тых, што ўказаны на сайтах гасцiнiц. Клiкаю на першы ж гатэль — просяць увесці даныя пра гасцей, у тым ліку пашпартныя, i аплаціць. А калі нешта зменіцца ў планах? Ва ўмовах адмены — пуста. Мабыць, прыйдзецца тэлефанаваць і ўдакладняць. Нязручна. Вырашаю выбраць экскурсію на тыя ж даты. Высвечваецца 11 варыянтаў, у тым ліку паездкі ў Брэст, Гродна, «Дудуткі», «кругасветка» з наведваннем замкаў. Ёсць нават тур на БелАЗ. А можа, у санаторый на тыдзень? Выбіраць прыходзіцца ўсяго з сямі варыянтаў. А дзе астатнія здраўніцы?.. 

За каментарыем я звярнулася да Вольгі Дземяшкевіч:

— Пакуль на партале прадстаўлена больш за 40 экскурсійных маршрутаў, звыш 35 аб'ектаў для пражывання — ад хостэлаў да санаторыяў, ёсць варыянты трансферу, інфармацыя больш чым пра тысячу славутасцей. Тут жа сабраны цікавыя факты пра краіну, афіша маючых адбыцца падзей. Разлічваем да канца года па максімуму папоўніць усе раздзелы. Чакаецца, што праект стане кансалідатарам усіх відаў турпаслуг краіны. 

Што тычыцца навігацыі, яна зручная, простая і нагадвае вядомыя сістэмы браніравання. Па словах распрацоўшчыкаў, пры стварэнні партала быў улічаны вопыт найбуйнейшых сусветных пляцовак анлайн-браніравання, такіх як Booking і Expedia. У бліжэйшых планах — арганізацыя з дапамогай рэсурсу продажу авіябілетаў, а таксама запуск мабільнай праграмы Vetliva.

Пакуль жа стваральнікі партала просяць пастаўшчыкоў турпаслуг больш актыўна размяшчаць свае прапановы ў сістэме, каб у карыстальнікаў было як мага больш выбару. А ён ёсць, настойваюць эксперты. Праўда, у топе папулярных запытаў, па словах дырэктара туркампаніі «Віаполь» Галіны Патаевай, па-ранейшаму значацца Мір і Нясвіж:

— Нават нягледзячы на прэтэнзіі ў залішней рэстаўрацыі, гэта найбагацейшыя музеі і, несумненна, самыя яркія і важныя тураб'екты ў нас у краіне.

Цікавяцца нашы і прыезджыя турысты таксама «Дудуткамі», хочуць наведаць Хатынь, пабываць на агляднай экскурсіі па Мінску. Гэта што тычыцца аднадзённых экскурсій. А туры, якія становяцца папулярнымі, больш звязаны з Брэстам: Брэст — Белавежская пушча. Да Гродна таксама вялікая цікавасць. 

druk@sb.by

Заметили ошибку? Пожалуйста, выделите её и нажмите Ctrl+Enter
Версия для печати
Заполните форму или Авторизуйтесь
 
*
 
 
 
*
 
Написать сообщение …Загрузить файлы?
Новости
Все новости