Минск
+9 oC
USD: 2.19
EUR: 2.38

Рыбалкой надо болеть: сколько можно заработать на продаже рыболовных товаров

Бізнес на кручку

Цiшыня, якую перабiваюць спеў птушак i кумканне жаб, свежае паветра, туманная смуга над воднай роўняддзю, на якой раптам утвараюцца кругавыя хвалi — клюе... Рыбалка — занятак супярэчлiвы. Быццам i выбiраешся з горада адпачыць ад шуму шырокiх вулiц i мiтуснi, але i ёсць тут доля азарту: хто ж сёння патрапiць на прынаду? А ў рыбакоў іх з сабой —  цэлы арсенал. Вяртлюгi, матавiлы, грузiкi, кручкi. Прадпрымальнiк Павел Зелень лiчыць, што рыбалку альбо любiш, альбо не. Iншага не бывае. Ён адкрыў рыбалоўны iнтэрнэт-магазiн, дзе нават самы заўзяты аматар адшукае неабходную прыладу.

Надвор’е ў гэтым годзе сыграла злы жарт — спад у бiзнесе Паўла працягваецца.

Вуда анлайн

Рыбаком звычайна ўяўляеш мужчыну гадоў за 45—50. Паўлу менш за 30, i, па яго словах, ён у сферы гандлю рыбалоўнымi таварамi адзiн з самых маладых. Мы сустракаемся ў яго рознiчным магазiне, якi ён адкрыў усяго пару месяцаў таму. Прадпрымальнiк наракае на надвор’е за акном:

— Зараз сяджу амаль без працы. Для нас пiк несезона — гэта канец кастрычнiка — пачатак лiстапада. Продажы цiшэюць да таго моманту, пакуль азёры не абрастуць iльдамi.

Надвор’е ў гэтым годзе сыграла злы жарт — спад у бiзнесе Паўла працягваецца. Праўда, Новы год заўсёды працягвае руку дапамогi i гэтым разам вельмi выручыў.

Магазiн перад святамi напоўнiўся дзяўчатамi, якiя шукалi падарункi для сваiх мужчын — бацькоў, братоў, сяброў. Набываюць яны часцей за ўсё падарункавыя сертыфiкаты, радзей — што-небудзь канкрэтнае, па запыце. Аднак пераважаюць сярод пакупнiкоў усё роўна мужчыны — iх 80 працэнтаў. Дарэчы, iх сярэднi ўзрост — ад 25 да 35 гадоў.

У прадпрымальнiка — стаўка на iнтэрнэт-магазiн i продаж праз дастаўку, мiнiмальны чэк складае 35 рублёў. Рэдка бывае, што заказ перавышае 300—400 рублёў.

Павел тлумачыць, што гэта з-за канцэпцыi iнтэрнэт-магазiна, якi ён адкрыў пяць гадоў таму. Пасля заканчэння лесагаспадарчага факультэта БДТУ Павел адправiўся ў Оршу працаваць па размеркаваннi, але ведаў, што пасля яго заканчэння абавязкова вернецца ў Мiнск.

— Уяўлення не меў, чым буду займацца, але нi ад каго не хацеў залежаць. Як кажуць, знайдзi працу мары i больш нiколi не працуй, — жартуе Павел.

Успамiнае, як, будучы хлапчуком, цягнуў маму за руку ў рыбалоўны магазiн: «Калi ласка, мама, купi!» Рознакаляровыя блешнi, першая вуда, захапленне i гонар за першага злоўленага карасiка — Павел з маленства «хварэў» на рыбалку.

— Паралельна з асноўнай працай я пачаў вывучаць сегмент рыбалоўнага рынку. А менавiта — iнтэрнэт-магазiны. Пяць гадоў таму канкурэнцыя ў гэтай нiшы была яшчэ не такая жорсткая, як цяпер, — сцвярджае ён.

«Часта звяртаюцца рыбакi-пачаткоўцы. Я раю купляць на старце вуду за 40 рублёў, а не за 200, таму што рыбалка альбо падабаецца, альбо не».

Адной з першых задач было знайсцi добрага праграмiста, якi зробiць функцыянальны сайт. Пасля яго распрацоўкi пачалося напаўненне таварамi, iнфармацыяй аб iнтэрнэт-магазiне. Назапашанага бюджэту, каля 10 000 рублёў у сучасным эквiваленце, хапала для таго, каб закупляць па меры паступлення заказаў розныя тавары. Адзiны мiнус — пастаўшчыкi не рабiлi ў такiм выпадку аптовую знiжку.

На працягу года колькасць заказаў павялiчвалася i прыбытак быў роўны зарплаце, якую атрымлiваў Павел на асноўнай працы. «Адпаведна, калi больш часу надаваць iнтэрнэт-магазiну, то i заробак з яе ўзрасце», — разважаў ён тады. Вырашыў звольнiцца i ўсе сiлы i грошы ўкладваць у сваю справу.

А што далей?

Каб арандаваць склад для тавару, спачатку фiнансаў не было, таму яго функцыi часова выконвала кватэра. Калi ўжо не было дзе развярнуцца, прадпрымальнiк знайшоў памяшканне на 18 квадратных метраў у адмiнiстрацыйным будынку з невысокiм коштам арэнды.



Павел стаў i прадаўцом, i кур’ерам, i бухгалтарам у адной асобе. Працаваў з 9 ранiцы да 10 вечара. I зразумеў, што не спраўляецца. Яго жонка сышла з працы, атрымлiвала другую вышэйшую адукацыю па праграмаваннi. Сфера iнтэрнэт-гандлю тады была асаблiва папулярная. Так спадарожнiца жыцця стала яшчэ i кампаньёнам Паўла, узялася дапамагаць з сайтам i вывучаць усе нюансы прасоўвання iнтэрнэт-магазiна. Пакуль Павел дастаўляў заказы, яна была на пункце самавывазу.

Цягам гадоў без водпуску яны зарабiлi дастатковую суму, каб абрастаць запасамi новых тавараў. Неўзабаве невялiкага склада стала мала. Яму на замену прадпрымальнiк знайшоў у тры разы большае памяшканне. Вырашыў выкарыстоўваць яго i як пункт самавывазу, i, галоўнае, як рознiчны магазiн.

У прадпрымальнiка — стаўка на iнтэрнэт-магазiн i продаж праз дастаўку, мiнiмальны чэк складае 35 рублёў. Рэдка бывае, што заказ перавышае 300—400 рублёў. Дарэчы, прыкладна столькi каштуюць адны з самых дарагiх тавараў — шпулькi, спiнiнгi.



— Няма канкрэтнай пазiцыi сярод тавараў, якая дае заробак. У прайсе пастаўшчыкоў — больш за 10000 найменняў. Iх прапануеш на сайце, але нiколi не ведаеш, што будзе прадавацца. Таму рызыка ёсць, — расказвае Павел i дадае: — Часта звяртаюцца рыбакi-пачаткоўцы. Я раю купляць на старце вуду за 40 рублёў, а не за 200, таму што рыбалка альбо падабаецца, альбо не. Ёсць яшчэ i такi тып клiентаў, як «адпачывальнiкi на прыродзе». Едуць на возера, смажаць шашлыкi, а набытая вуда можа праляжаць увесь гэты час у багажнiку.

Дарэчы, у апошнiя гады адпачынак на свежым паветры набiрае папулярнасць, што i на продажах можа сыграць пазiтыўна. У краму клiенты часцей заходзяць па драбнiцы — лёска, паплаўкi, кручкi, прыкорм.

— У раёне Лагойскага тракта даволi шмат крамаў, улiчваючы вашу. Чаму так? заўважаю я.

— Усё проста. Мы на выездзе з горада. Гэтак жа i на праспекце Дзяржынскага, Партызанскiм. Немалаважна, што побач знаходзяцца крупныя пастаўшчыкi, — тлумачыць Павел.

Дарэчы, ён працуе выключна з беларускiмi пастаўшчыкамi, якiя iмпартуюць прадукцыю з Мас­квы, Еўропы i Кiтая.

— Я б i сам вазiў з Расii тавар. Але неабходнасцi ў гэтым няма. Калi выходзiш на добры аб’ём продажаў, табе робяць знiжку, i праблем з дакументамi нiякiх не будзе. Я заўсёды сачу за тым, каб на ўсе пазiцыi былi сертыфiкаты адпаведнасцi. Начытаўся выпадкаў з паверкi i ў казусныя сiтуацыi трапляць не хачу.



Яшчэ адзiн цiкавы факт. У суполцы «ВКонтакте», прывязанай да рыбалоўнага iнтэрнэт-магазiна, цяпер 7000 падпiсчыкаў. Як атрымалася так раскруцiцца? Аказваецца, прадпрымальнiк практычна не трацiцца на рэкламу. Дзякуючы цiкавасцi да рыбалкi, ён стварыў супольнасць «Рыбалка для ўсiх» гадоў сем таму, дадаваў туды ўсякiя дэматыватары i прыколы пра рыбалку. «Я нават не ведаў, што калiсьцi выкарыстаю суполку для магазiна. Пасля таго як адкрыў яго, пачаў праводзiць розыгрышы для прасоўвання», — распавядае прадпрымальнiк.

У цэлым, яго бiзнес грунтуецца на зносiнах з клiентамi. Часам прыйдзе мужычок па леску i давай паказваць фатаграфii ў тэлефоне з нядаўна злоўленым важкiм шчупаком. I абавязкова распавядае захапляльную гiсторыю, як яго  злавiў.

Па словах Паўла, пакуль самы вялiкi план на будучыню — дамагчыся, каб рознiчны магазiн пачаў прыносiць прыбытак.

ТОЛЬКI ЛIЧБЫ

2000 рублёў — сярэднi прыбытак у месяц

1400 рублёў — арэндная плата

40000 рублёў — кошт закупкi тавару

100 рублёў — выдаткi на рэкламу

200 рублёў — арэнда склада    

malyshchyts@sb.by
Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Фото: Алексей ВЯЗМИТИНОВ
Загрузка...