З зімовай рыбалкі не вярнуліся ўжо 13 рыбакоў

Надвор’е нарэшце здзейсніла мары аматараў зімовай рыбалкі: вадаёмы скавалі маразы. Таўшчыня лёду ў многіх месцах дасягае 12—15 см, таму забарона выхаду на лёд знята. Тым не менш заўсёды застаецца небяспека ўтварэння прамывін. Нават у такія халодныя дні ўжо зафіксаваны тры выпадкі, калі людзі правальва-ліся пад лёд. Карэспандэнт «Р» адправілася на Смалявіцкае вадасховішча, каб паглядзець, як рыбакі клапоцяцца аб сваёй бяспецы.


Ад белізны снегу, пакрыўшага вадаём, аж вачам балюча. На лёдзе ўжо ўладкаваліся рыбакі са сваімі вудамі і бурамі.

— Хоць лёд дастаткова моцны, многія рыбакі стараюцца трымацца бліжэй да нас, — заўважае Вадзім Новік, начальнік Смалявіцкай выратавальнай станцыі. — Мала ў каго ёсць выратавальныя сродкі, спадзяюцца на нашы.

Што ж, паглядзім!

Каля ног Сяргея, рыбака са Смалявіч, б’юцца на снезе некалькі маленькіх, з карандаш, плотачак. 

— Нешта буйное тут цягнуў, але сарвалася, — бядуе ён. 

Рыбачыць Сяргей у асноўным зімой, калі мае больш вольнага часу. Прызнаецца, што сезон адкрыў, калі лёд быў яшчэ слабы, але тут жа падкрэслівае, што стараецца трымацца бліжэй да берага:

— Я яшчэ жыць хачу!

Асцярожнасць ды прага да жыцця — вось і ўсе яго выратавальныя сродкі.

У чаканні паклёўкі Аляксей Мазынскі з Жодзіна грэецца гарбатай. 

— Не хоча лавіцца! Дзве плотачкі — і ўсё, — скардзіцца ён. — Відаць, перапад атмасфернага ціску.

З вудай на вадаёмы ён выпраўляецца заўсёды, калі выпадае вольная часіна, хоць летам, хоць зімой. Пачуўшы пытанне, ці выходзіць на тонкі лёд, нават крыху абураецца:

— Ходзім, канешне! Ну, правальваўся пару разоў: па калена, амаль па пояс. Сам вінаваты: вясна ўжо была, а мне ўсё хацелася далей ад берага адысці.  

Варта заўважыць, што гэты рызыкоўны чалавек даволі нядрэнна экіпіраваны. З нагрудных кішэняў тырчаць зачэпы — металічныя штыры з завостранымі наканечнікамі, да якіх прымайстраваны петлі, што мацуюць на запясці. Па словах рыбака, абзавесціся імі яго прымусіў сын. Акрамя таго, Аляксей паказвае нам скрутак трывалай капронавай вяроўкі з грузам на канцы.

А вось Павел Вярбіцкі на тонкі лёд увогуле не ходзіць:

— Навошта лезці туды, куда не трэба?  

Мусіць, таму і сродкаў выратавання пры сабе не мае.

Між тым супрацоўнікі таварыства ратавання на водах (Асвод) усё ж просяць рыбакоў не губляць пільнасць. Ужо пасля наступлення халадоў стала вядома пра тры выпадкі, калі людзі правальваліся пад лёд. Рыбак, што апынуўся ў вадзе гомельскага вяслярнага канала, абавязаны жыццём прахожай жанчыне. Яна спачатку паспрабавала выцягнуць яго з вады самастойна, а не здолеўшы, падняла гвалт, і на дапамогу прыбеглі мужчыны, што вудзілі рыбу непадалёк. 


На рэчцы Абалянка ў Гарадоцкім раёне Віцебскай вобласці загінуў 64-гадовы рыбак. Рака там выцякае з возера, а ў такіх месцах лёд танчэйшы з-за плыні  нават у моцныя маразы. Да таго ж рыбак дапусціў элементарныя парушэнні: апрануў рукзак на дзве лямкі, тым самым пазбавіўшы сябе магчымасці хутка вызваліцца ад грузу. Пры ім былі лыжы, але рухаўся ён чамусьці пешшу.

Учора раніцай добрушскія ратавальнікі дасталі з вады маладога чалавека, які паспрабаваў скараціць шлях на вакзал, рушыў напрамкі цераз раку і праваліўся пад лёд. З-за пераахаладжэння яго шпіталізавалі. 

— Нам вядома таўшчыня лёду на водных аб’ектах, дзе ёсць выратавальныя станцыі або пункты, — папярэджвае Алег Баразна, вядучы спецыяліст рэспубліканскага Асвода. — А ў краіне ж дзясяткі тысяч вадаёмаў. Плынь на рэках можа стаць прычынай узнікнення прамывін, асабліва ў месцах зліцця, выхаду цёплых або сцёкавых вод. 

На азёрах лёд звычайна таўсцейшы, аднак і там яго могуць парушыць падводныя крыніцы, моцны вецер. Танчэйшы ён і каля расліннасці, напрыклад у зарас-ніках чароту. Так што губляць пільнасць і ігнараваць сродкі выратавання не трэба нават у моцны мароз. 

nevmer@mail.ru