Вера Аляксандраўна Гарошка з вёскі Свішчы Жабінкаўскага раёна жыццё пражыла нялёгкае. Былі ў ім страшныя ваенныя гады, давялося дзяўчыне пабываць у нямецкім палоне. Не скажаш, што лёгка было аднаўляць калгасную гаспадарку ў пасляваенныя гады. Праз усё гэта Вера Аляксандраўна прайшла з годнасцю, нарадзіла чацвярых дзетак, мае сёння пяць унучак, двух унукаў і сем праўнукаў. І, вядома, павагу аднавяскоўцаў, кіраўніцтва калгаса імя Чапаева, дзе яна адпрацавала шмат гадоў паляводам, увагу сацыяльных работнікаў, добрую пенсію. І, самае галоўнае, у свае 93 гады трымаецца малайцом, па-гаспадарску пільна паглядае ў акенца, лашчыць ката і чакае ў госці дзяцей, унукаў і праўнукаў.
Святлана КIСЛАЯ.
Фота аўтара.