У наступным годзе пачне працаваць навукова-даследчы цэнтр ЖКГ

Акадэмiя камунальных навук

Адна галава — добра, а дзве — яшчэ лепш. Менавiта па такім прынцыпе ў нашай краiне плануецца наводзiць належны парадак у камунальных справах. Тым больш што другая «галава» будзе на самай справе вучонай. «Навукоўцы павінны ўдзельнічаць у мадэрнізацыі жыллёва-камунальнай галіны» — такі галоўны вынік рэспубліканскага семінара «Аб удасканаленні і развіцці жыллёва-камунальнай гаспадаркі краіны». Камунальнікі зараз вырашаюць праблемы, зыходзячы з уласнага вопыту. І дапамога навуковым суправаджэннем ім не пашкодзіць. 

Навукова-даследчы цэнтр ЖКГ будзе працаваць пры Акадэміі навук
Фота Аляксандра КУШНЕРА

Галіна мае патрэбу ў інавацыйнай мадэрнізацыі, прызнаюць спецыялісты. Гэта значыць, што трэба не проста замяніць абсталяванне, а распрацаваць новыя тэхналогіі, тэхнічныя сродкі. І зоймецца гэтым навукова-даследчы цэнтр пры Акадэміі навук. Пакуль ён толькі фарміруецца, кажуць у НАН. Але пэўныя кiрункі яго дзейнасці ўжо можна акрэсліць. Спецыялісты будуць распрацоўваць новыя нарматывы і рэкамендацыі, укараняць энергаэфектыўныя тэхналогіі і тэхсродкі, падрыхтоўваць кадры, аналізаваць эканоміку галіны. Адным з напрамкаў стане каардынацыя даследаванняў, накіраваных на развіццё тых ці іншых кiрункаў галіны ЖКГ. 

У цэнтры, як мяркуецца, створаць шэсць навукова-даследчых аддзелаў. Першымі пачнуць працу аддзелы эканомікі, жыллёвай гаспадаркі, рэсурсаў і навукова-тэхнічнага развіцця, інфарматызацыі ЖКГ. 

Асноўныя задачы ўстановы ўжо абазначаны. Адно з першых заданняў тычыцца даследавання і абгрунтавання параметраў надзейнасці і энергаёмістасці ліфтаў у жыллёвым сектары. Навукоўцы дэталёва прапрацуюць тэхнічныя патрабаванні для ліфтаў новага пакалення. Стварэнне цэнтра не толькі аб'яднае патэнцыял вучоных, але і накіруе яго ў патрэбнае рэчышча, дасць магчымасць распрацоўваць канкрэтныя доўгатэрміновыя праекты і ўкараняць іх.

misnik@sb.by
Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter