Тэатралаў Беларускага дзяржаўнага акадэмічнага музычнага тэатра ў пачатку сезона будуць забаўляць, як ні дзіўна, артысты з Казахстана. З 26 верасня па 5 кастрычніка тут пройдуць гастролі Карагандзінскага акадэмічнага тэатра музычнай камедыі, які прывязе свае версіі “Баядэры”, “Сільвы”, “Марыцы”, “Цыганскага барона” і іншых шэдэўраў сусветнай класікі.
Купалаўцы восеньскі сезон вырашылі наогул пачаць за мяжой. У Томску артысты паказалі спектаклі “Офіс”, “Ноч на Каляды” і “Паўлінку”. Сімвалічна, што менавіта ў гэтым расійскім горадзе семдзесят гадоў таму і была ўпершыню пастаўлена вядомая купалаўская п’еса.
Рэспубліканскі тэатр беларускай драматургіі ў новым сезоне вырашыў дзейнічаць не па фармаце. Ужо ў лістападзе тут адбудзецца прэм’ера, якая, абяцае кіраўніцтва тэатра, уразіць уяўленне крытыкаў і тэатралаў, — дакументальны праект-спектакль з папярэдняй назвай “Напэўна” Аляксандра Марчанкі. У бліжэйшы час тут збіраюцца таксама паставіць “Вялікае перасяленне вырадкаў” па п’есе Мікалая Рудкоўскага і спектакль “Каханне людзей” па творы Дзмітрыя Багаслаўскага. Такім чынам, сумаваць беларускім тэатралам у новым сезоне не давядзецца.
