Ужо вядома, як будзе выглядаць першы помнік народнаму паэту Беларусі Максіму Танку.
Паэт ідзе па высланай каменнем дарозе, якая ўвасабляе яго жыццёвы шлях. Нібы ў вершы «Камяні», які напісаны ў далёкім 1946 годзе. Такім у камені і бронзе паўстане ён перад нашчадкамі. Як плануецца, помнік ужо сёлета з’явіцца ў Мядзелі на рагу вуліцы 17 Верасня і плошчы Шаранговіча.
У мінулым годзе Міністэрства культуры аб’явіла конкурс эскізных праектаў для помніка народнаму паэту. Днямі ў мастацкай галерэі «Акадэмія» пры Беларускай дзяржаўнай акадэміі мастацтваў адбылося пасяджэнне журы, якое разгледзела прадстаўленыя чатыры праекты помніка. У выніку быў ухвалены варыянт скульптараў Аляксандра Фінскага, Івана Міско і архітэктара Армэна Сардарава. Скульптура вышынёй 2,8 м будзе створана з каменя і бронзы. Яшчэ будуць дапрацоўвацца пэўныя дэталі ў прывязцы да мясцовасці, што мяркуецца зрабіць у бліжэйшы час, а таксама трэба вызначыцца з арганізацыяй — вытворцай помніка.
Рашэнне пра стварэнне помніка і ўстаноўку яго ў Мядзелі (нагадаем, што нара-дзіўся славуты паэт у вёсцы Пількаўшчына, што зараз у Мядзельскім раёне) было адобрана кіраўніком дзяржавы. Фінансаваць праект будуць Міністэрства культуры і Мінскі аблвыканкам. Разам з тым плануецца адкрыць і дабрачынны рахунак у дапамогу гэтай патрэбнай справе.
