Молчан вядомы шырокай публіцы ў першую чаргу як аўтар песенных хітоў «Маргарыта», «Стася», «Малітва», «На одной волне», «Любовь сказала да», Liebe Love L'amore і іншых. Але пісаў ён і вакальныя кампазіцыі, і інструментальныя творы, і музыку да спектакляў. Вечар памяці «Там, высока» шырока прадставіць творчасць кампазітара. У канцэрце, паведамляе philharmonic.by, прымуць удзел хор Свята-Духава кафедральнага сабора, Дзяржаўны камерны хор Беларусі. Выйдуць на сцэну і артысты, з якімі Алег Молчан плённа супрацоўнічаў доўгія гады: Анатоль Кашапараў, Вадзім Касенка, Мікалай Скорыкаў, гурты «Чысты голас» і «Бай Сіці». Фартэпіянныя п'есы Молчана выканае Аляксандр Музыкантаў. А ўдава Ірына Відава прадставіць публіцы дзве новыя песні мужа, якія ён паспеў напісаць перад смерцю, яны яшчэ не гучалі са сцэны. Усяго ў канцэрце публіка пачуе шэсць прэм'ер.
Акрамя гэтага, у фае філармоніі 25 кастрычніка пры ўдзеле Музея Уладзіміра Мулявіна будзе арганізавана выстава фатаграфій, канцэртных касцюмаў, інструментаў, рукапісных клавіраў, нотных і CD-выданняў Алега Молчана.
