Як паведаміла намеснік начальніка аддзела гігіены, эпідэміялогіі і прафілактыкі Міністэрства аховы здароўя Іна Карабан, сярод ВРВІ распаўсюджаны характэрныя для сезона адэна- і рынавірусы, парагрып і грып: «Адзначаюцца грыпозныя вірусы тыпу А Н3N2 і групы B. Папярэдні прагноз апраўдаў сябе. Чакаем рост захворвання ў канцы студзеня — пачатку лютага. Паколькі дзеці былі на канікулах, а студэнты выходзяць на канікулы, значна інфекцыя не распаўсюджваецца».
Вірус тыпу А Н3N2 не новы. Ён характэрны для краін Паўночнага паўшар’я. Упершыню выяўлены ў 1968 годзе. З тых часоў цыркулюе перыядычна падчас сезоннага ўздыму захворвання, але не ў першапачатковым выглядзе. Паверхневыя бялкі вірусаў грыпу пастаянна мяняюцца. Спецыялісты ўлічваюць гэта пры вытворчасці вакцыны. Па даных Сусветнай арганізацыі аховы здароўя, штамы, якія цыркулююць у гэтым сезоне, супадаюць з вакцынавірусамі. Чакаецца высокая эфектыўнасць прышчэпак.
Кіраўнік Нацыянальнага цэнтра па грыпе Рэспубліканскага навукова-практычнага цэнтра эпідэміялогіі і мікрабіялогіі Наталля Грыбкова адзначыла, што грып у гэтым сезоне выяўляюць у асноўным у непрышчэпленых пацыентаў: «Грып — гэта сур’ёзнае інфекцыйнае захворванне. Калі не прытрымлівацца рэкамендацый урача, хадзiць на працу, інфекцыя можа выклікаць ускладненні. Практычна ў кожнага чалавека ёсць хранічныя захворванні. Грып выклікае іх абвастрэнне, уплывае на сардэчна-сасудзістую сістэму, дыхальны апарат. Адбываецца моцная інтаксікацыя».
Спецыялісты Міністэрства аховы здароўя запэўніваюць: падставы для турботы няма. Аддзяленні пульманалогіі не перапоўненыя. Выпадкі пнеўманіі рэгіструюцца на працягу ўсяго года. Не толькі вірус грыпу выклікае запаленне лёгкіх, але і іншыя вірусныя і бактэрыяльныя інфекцыі.
Эпідэміёлагі штодня адсочваюць сітуацыю ў дзіцячых садках і школах. Калі адсутных па прычыне хваробы ва ўстанове больш за 30 працэнтаў, вырашаецца пытанне аб увядзенні каранціну.
Па даных Міністэрства аховы здароўя, у гэтым сезоне прышчэпку атрымалi 41 працэнт беларусаў. Школьнікі прышчэплены на 60 працэнтаў.
«На жаль, у людзей захоўваецца насцярожанае стаўленне да вакцынацыі супраць грыпу, — заўважае Іна Аляксандраўна. — Вядома, прышчэпка не гарантуе таго, што чалавек не захварэе. Вірусы грыпу пастаянна муціруюць, і немагчыма стварыць універсальную вакцыну. Але эфектыўнасць прышчэпкі выяўляецца ў тым, што захворванне працякае менш цяжка і без ускладненняў, таму што антыцелы, якія выпрацаваліся пасля прышчэпкі, будуць дзейнічаць супраць віруса адразу. Як паказвае штогадовы аналіз сезоннага захворвання, часцей вірус распаўсюджваецца ад непрышчэпленых. Важна не панікаваць, а праводзіць элементарныя меры прафілактыкі. Мыць рукі і праветрываць памяшканне, праціраць дзвярныя ручкі, сталы, праводзіць вільготнае прыбіранне. Калі ў доме хворы з пацверджаным грыпам, можна прыняць прафілактычна супрацьгрыпозны прэпарат, але не злоўжываць.
